O CITIC da UDC celebrou unha xornada para potenciar o retorno do talento emigrado

13/06/2019 - CITIC
  • O evento, que contou con preto de medio centenar de asistentes, tivo o obxectivo de valorizar mobilización internacional e fomentar iniciativas que faciliten o regreso dos profesionais.
  • A mesa de apertura foi a cargo do reitor da UDC, o presidente do Consello Social da UDC e o director do CITIC. Participaron na xornada catro expertos no panorama nacional que presentaron diferentes programas de captación de talento.

A Coruña, 13 de xuño de 2019.- O Centro de Investigación TIC (CITIC) da Universidade da Coruña acolleu esta mañá a xornada ‘Retornando talento emigrado’, organizada xunto co Consello Social da UDC, co obxectivo de poñer en valor a mobilización internacional do persoal docente e investigador e impulsar iniciativas que posibiliten o regreso destes profesionais para transferir o coñecemento e excelencia a súa Universidade e país de orixe. A xornada contou con preto de medio centenar de asistentes.

A apertura do evento foi a cargo do reitor da UDC, Julio Abalde; o presidente do Consello Social da UDC, Antonio Abril Abadín; e o director do CITIC, Manuel F. González Penedo. Así, o reitor da UDC sinalou na inauguración da xornada que a Universidade ten “un reto moi importante”, xa que “ademais de atraer talento, tamén debe conseguir retelo” e proporcionar “estabilidade e posibilidade de desenvolvemento da carreira investigadora”.

Pola súa banda, o director do CITIC, indicou que o obxectivo do centro é “dar un paso máis no retorno e na captación de persoal” e que se deben “atopar fórmulas que permitan recuperar a esas persoas e integralas no ámbito da Universidade”. O presidente do Consello Social da UDC destacou a “aposta da Universidade pola investigación como garantía de futuro do noso país”, apuntando tamén que “o saldo migratorio do talento é moi negativo, xa que en España non se aposta por iso”.

Participaron no evento diferentes expertos do panorama nacional que presentaron diferentes programas de captación de talento: o director do Centro de Regulación Genómica (CRG), Luis Serrano Pubul, que presentou a SOMM Alliance; o vicerreitor de Política Científica, Investigación e Transferencia da UDC, Salvador Naya Fernández, co programa INTALENT; o director xeral de Ikerbasque, a Fundación Vasca para a Ciencia, Íñigo Atxutegi Basagoiti; e o director de ICREA, Antonio Huerta Cerezuela.

Sobre o CITIC

O CITIC é un Centro de Investigación Singular que potencia o avance e a excelencia en I+D+i aplicado ás TIC. Impulsado pola Universidade da Coruña, é un punto de encontro entre a Universidade e a empresa no que conflúen departamentos de I+D de empresas do sector TIC con investigadores procedentes do ámbito universitario. No ano 2016, o CITIC recibe o distintivo de Centro Singular de Investigación de Galicia 2016-2019, sendo o único centro TIC de Galicia recoñecido con esta distinción, cofinanciado pola Xunta de Galicia e pola Unión Europea a través do Fondo Europeo de Desenvolvemento Rexional.


Xornada Retornando talento emigrado
Xornada Retornando talento emigrado
Xornada Retornando talento emigrado
Xornada Retornando talento emigrado
Xornada Retornando talento emigrado
Xornada Retornando talento emigrado