NOVIDADES



O CITIC recibiu hoxe a visita dun grupo de alumnos de diferentes universidades mexicanas, provenientes de diferentes estudos superiores tales como enxeñaría mecatrónica, enxeñaría informática e enxeñaría biomédica, que participan no Programa Delfín. Este programa foi creado por diferentes universidades mexicanas co obxectivo de fomentar a formación de capital intelectual de alto nivel académico, que contribúa ao desenvolvemento rexional, nacional e internacional. Os participantes deste programa son mozos con talento e vocación pola ciencia e a tecnoloxía.

Os estudantes participantes neste programa que visitaron o centro, integráronse nun proxecto de investigación asesorados polo investigador do CITIC Alejandro Pazos nunha estancia académica cunha duración de sete semanas na Universidade da Coruña.

Na visita, o subdirector do CITIC, Javier Pereira, achegoulles o traballo desenvolvido no CITIC e as liñas de actuación do centro. Despois, o grupo dirixiuse ao edificio de ampliación do CITIC, onde se atopa o Centro de Procesamento de Datos (CPD), onde o responsable da unidade de sistemas do CITIC, Alejandro Mosteiro, lles explicou o seu funcionamento.

A visita finalizou na sala Show Room, onde se lles mostrou un sistema de monitorización dunha unidade de coidados críticos no ámbito médico e outros demostradores de tecnoloxía desenvolvida no centro, tales como o eBack, que permite corrixir a posición postural da columna vertebral. Os estudantes tamén puideron coñecer o funcionamento de Robobo, deseñado pola spin-off da UDC MINT, creada por investigadores do CITIC do grupo GII, pensado para achegar robots educativos de baixo custo ao ámbito educativo.

LER MÁS

O CITIC incorporouse á Asociación Española para a Intelixencia Artificial (AEPIA), sendo o primeiro centro de investigación español en formar parte dela. Trátase dunha asociación sen ánimo de lucro creada en 1983 e formada por socios numerarios e institucionais, que ten o obxectivo de fomentar o desenvolvemento da Intelixencia Artificial tanto no ámbito español como no Iberoamericano.

Entre os fins da AEPIA atópase a creación e coordinación de grupos de traballo, o apoio á transferencia de tecnoloxía, o apoio a entidades para facilitar a súa innovación e aplicación das técnicas e aplicacións da Intelixencia Artificial, proporcionar un soporte e foro de discusión a investigadores e estudantes nas súas actividades relacionadas coa Intelixencia Artificial, desde os aspectos de investigación científica e tecnolóxica, desenvolvemento, aplicación e docencia.

No CITIC ao redor da metade dos investigadores traballan en proxectos relacionados coa IA, polo que é unha disciplina de gran interese para o Centro. Unha das súas tres áreas tecnolóxicas, en concreto a de Percepción, Cognición e Interacción, cobre un amplo espectro de técnicas de Intelixencia Artificial. Cabe destacar tamén que a presidenta da AEPIA, Amparo Alonso, é investigadora do CITIC.

A incorporación do CITIC á AEPIA suporá unha excelente oportunidade para a cooperación con diferentes institucións no ámbito da IA e o fomento da transferencia de resultados á sociedade.

LER MÁS

A investigadora do CITIC, catedrática de Computación e IA da UDC e presidenta da AEPIA, Amparo Alonso, participará no “Foro Inteligencia en constante evolución” que terá lugar o próximo 13 de xuño ás 19:00 h no Museo Domus da Coruña. Este acto englóbase nunha serie de cinco encontros en torno á evolución da sociedade, a creatividade, a tecnoloxía, a ciencia e a intelixencia, que organiza a Fundación Pfizer con motivo do seu vixésimo aniversario.

A intervención de Amparo Alonso centrarase en quen nos axudarán a comprender o pasado, presente e futuro da intelixencia humana e como a Intelixencia Artificial contribuirá á súa evolución.

O evento estará moderado polo recoñecido xornalista e escritor David Canteiro. Tamén participará no evento Ignacio Martínez Mendizábal, paleontólogo no xacemento de Atapuerca e experto na evolución humana, cuxa conferencia versará sobre os cambios e evolución que experimentará a intelixencia humana desde os primeiros homínidos ata a actualidade, para culminar na aparición da intelixencia artificial como evolución da propia natureza humana.

LER MÁS

Investigadores do CITIC colaboran coa cátedra Handytronic - Grupo Telecon, dirixida polo subdirector do centro, Javier Pereira, e adscrita á Facultade de Informática da UDC, na organización dun curso gratuíto de introdución a RedCap (Research Electronic Data Capture), unha plataforma para investigación que permite a captura de datos de estudos biomédicos.

O curso semipresencial “Redcap. Registro de datos en estudios biomédicos” tratará os fundamentos de utilización da plataforma como investigador e exemplos de proxectos no que se utilizan escalas e tests para levar a cabo diferentes tipos de estudos. O curso consta de dous partes: por un lado, o curso presencial cunha duración de 4 horas e, por outra, un proxecto de desenvolvemento virtual cunha esixencia de dedicación estimada doutras 6 horas. Este módulo será desenvolto utilizando a plataforma de teleformación Moodle.

O rexistro é aberto e gratuíto

LER MÁS

A semana pasada, o Living Lab do CITIC recibiu a primeira visita dunha persoa con diversidade funcional para avaliar a experiencia que transmite unha contorna de realidade virtual. Trátase da primeira proba realizada no marco do convenio de colaboración asinado entre o CITIC e COGAMI.

Así, a través das lentes HTC, durante as probas experimentáronse varios escenarios, entre os que destacan un en movemento (simulación de montaña rusa) e outro de posicionamiento espacial (GoogleEarth). Os resultados foron moi positivos, xa que a realidade virtual permitiu á persoa experimentar diferentes sensacións que nunha contorna real non podería realizar.

A partir desta primeira proba, evolucionarase ata chegar a contidos que permitan traballar de forma específica con estas persoas as actividades da vida diaria e promover a participación en actividades de lecer que, doutra forma, non poderían ter acceso. Dende o CITIC comezarase a traballar na creación e proba de entonos particulares e personalizados con contidos significativos para cada participante.

LER MÁS

O CITIC recibiu esta mañá a visita dun grupo de alumnos e alumnas da Universidade Senior da UDC, o programa universitario de maiores da Universidade da Coruña dirixido a persoas de idade igual ou superior a 50 anos.

Os alumnos visitaron as instalacións do CITIC da man do seu subdirector, Javier Pereira. Tras unha breve exposición das liñas de actividade do centro, os asistentes dirixíronse a cuberta do CITIC onde puideron coñecer o funcionamento dun sensor de predición de precipitacións desenvolto por investigadores do centro.

Posteriormente, no edificio CITIC 2 puideron coñecer o Centro de Proceso de Datos (CPD) e o seu funcionamento. A continuación, visitaron a sala Show Room onde se lles mostrou un sistema de monitoraxe dunha unidade de coidados críticos no ámbito médico e outros demostradores de tecnoloxía desenvolta no centro.

Por último, algúns dos asistentes tiveron a oportunidade de experimentar diferentes sensacións a través dunha contorna de realidade virtual, liña na que se está a traballar desde o grupo de investigación TALIONIS creando e probando contornas virtuais particulares e personalizadas.

LER MÁS

A Comisión Europea incluíu o proxecto BIRDS, coordinado pola investigadora do CITIC e directora do Campus Innova da UDC Susana Ladra, dentro da sección “success stories” da súa páxina web, onde se destacan os principais logros do mesmo e a importancia do traballo que se está levando a cabo.

Trátase dun novo recoñecemento para o proxecto liderado por Susana Ladra, que o pasado mes de outubro recibiu de mans da Presidencia Austríaca do Consello da UE o premio Marie Sklowska-Curie Actions 2018 na categoría “Briding (carrer) paths”, que valoraba as habilidades emprendedoras e o vínculo intersectorial dos proxectos H2020.

O proxecto BIRDS, Bioinformatics and Information Retrieval Data Structures Analysis and Design está financiado pola acción Marie Sklodowska-Curie (RISE) de intercambio de persoal de investigación e innovación pertencente ao programa de financiamento de I+D da UE Horizonte 2020 (proxecto con referencia 690941).

BIRDS xorde da necesidade de mellorar o procesamento de grandes volumes de datos existentes en diferentes campos de aplicación como a bioinformática e a recuperación de información. No proxecto, ademais da UDC, participan universidades de Finlandia, Xapón, Australia, Chile e Portugal.

LER MÁS

A profesora da Facultade de Psicoloxía da Universidade de Porto e codirectora do Laboratório de Reabilitação Psicossocial, Cristina Queiros, visitou o CITIC co obxectivo de poñer en marcha o proceso de avaliación desde a perspectiva psicolóxica dun estudo piloto sobre o estrés e a actividade física.

Este estudo estase levando a cabo entre o persoal do CITIC, utilizando wearables que permiten medir aspectos biométricos e unha plataforma de saúde participativa desenvolta polo grupo de Tecnoloxía Aplicada á Investigación en Ocupación, Igualdade e Saúde (TALIONIS). O proxecto está sendo promovido desde a Cátedra Handytronic-Grupo Telecon.

A estancia foi financiada polo programa IACOBUS, que ten como obxectivo principal fomentar a cooperación e o intercambio entre os recursos humanos dos centros de ensinanza superior da Eurorrexión Galicia - Norte de Portugal - Profesores; Investigadores; Persoal de Administración e Servizos (PAS), facilitando a posta en común de actividades formativas, de investigación e de divulgación.

LER MÁS

A investigadora do CITIC Thais Pousada participou onte na IV Semana Internacional Ceapat, que se celebra durante esta semana e está organizada polo Centro de Referencia Estatal de Autonomía Personal y Ayudas Técnicas (Ceapat) do Ministerio de Sanidade, Consumo e Benestar Social.

A investigadora presentou os principais resultados da súa tese, dirixida polo subdirector do CITIC, Javier Pereira, sobre a aplicación de ferramentas de medida de resultados en produtos de apoio. A súa presentación xerou un interesante debate sobre o impacto que pode producir a prescrición da cadeira de rodas na vida da persoa usuaria.

A IV Semana Internacional Ceapat celébrase co lema 'Con Ce de Capacidad' e ten o obxectivo de poñer o acento na necesidade de que os produtos e servizos, as contornas, as persoas, as empresas e as administracións públicas sexan capacitantes, contribuíndo de forma efectiva a mellorar a capacidade funcional dunha sociedade máis incluínte.

LER MÁS

O investigador do Grupo LYS do CITIC, Elmurod Kuriyozov, participou na 9th Language & Technology Conference - LTC 2019, celebrada en Poznan (Polonia), onde recibiu o Best Student Work Award polo seu traballo "Deep Learning vs. Classic Models on a New Uzbek Sentiment Analysis Dataset".

En dito traballo descríbese o primeiro corpora anotado para a clasificación da polaridade en lingua uzbeka, á vez que establece un primeiro baseline empregando tanto técnicas tradicionais de aprendizaxe automática coma técnicas de aprendizaxe profunda. A creación para o uzbeko deste tipo de recursos lingüístico-computacionais, dos que ata agora carecía, é un paso previo necesario para o desenvolvemento de sistemas de procesamento intelixente da información que poidan operar sobre este idioma.

Este traballo é resultado da colaboración establecida entre o Grupo LYS do CITIC e a Universidade Nacional de Uzbekistán no marco do proxecto europeo Erasmus CLASS: Desenvolvemento dun Máster Interdisciplinar en Lingüística Computacional en universidades de Asia Central (máis información).

LER MÁS

O investigador do CITIC Alejandro Pazos participou como avaliador de propostas de proxectos no programa estadounidense de investigación “Collaborative Research in Computational Neuroscience (CRCNS)” convocado pola National Science Foundation e coa colaboración en España da Axencia Estatal de Investigación (AEI) e o Instituto de Saúde Carlos III (ISCIII). Este programa está aberto a colaboracións internacionais entre investigadores americanos e de diferentes países de Europa e Asia.

Así, Alejandro Pazos foi un dos expertos nacionais encargados de avaliar as propostas e participar como panelista. Os paneis de expertos tiveron lugar durante o mes de marzo en Washington.

A revisión das propostas foi altamente interdisciplinaria, esixindo experiencia en neurociencia, bioloxía, ciencias da computación, matemáticas, estatística, psicoloxía, física, enxeñaría e outros campos.

Ademais, o investigador do CITIC tamén participará como avaliador neste mes de maio para a iniciativa “Appel à projets générique 2019” (AAPG 2019), da French National Research Agency, e para a iniciativa “Computational Life Sciences” da German Research Foundation.

LER MÁS

Con el objetivo de fomentar el interés de las niñas y las adolescentes por los estudios científico-técnicos, el CITIC de la UDC y Oracle Academy organizan el próximo 25 de mayo diferentes talleres formativos de temática tecnológica en los que participarán alrededor de 100 niñas con edades comprendidas entre los 5 y los 17 años. El proyecto, llamado Oracle4Girls tiene como finalidad promover el interés de las niñas y las adolescentes en las ramas tecnológicas y contribuir así a fomentar la presencia femenina en las carreras STEAM (Science, Technology, Engineering, Arts and Mathematics).

Durante la jornada, las niñas y adolescentes podrán participar en diferentes talleres en los que se fomentará la creatividad y la experimentación a través de talleres de robótica, programación y tecnología.

Paralelamente a los talleres, se organizarán dos charlas para padres. La primera, bajo el título "El futuro de la tecnología", tendrá lugar a las 10.00 horas y será impartida por Laura M. Castro, coordinadora del Grado de Ingeniería Informática de la UDC e investigadora del CITIC. La segunda charla, "Navega con Rumbo, será a las 12.00 horas y será impartida por Pilar Vila del CPEIG.

Los interesados en asistir al evento pueden formalizar su inscripción en la web del evento.

LER MÁS

Esta mañá o CITIC recibiu a visita dun grupo de alumnos e alumnas de 1º de bacharelato do IES Universidade Laboral de Culleredo. O subdirector do CITIC, Javier Pereira, e o integrante da unidade de Transferencia Tecnolóxica e Innovación do CITIC e profesor do IES Universidade Laboral, Jesús Díaz, presentaron ao alumnado o centro e as súas principais liñas de actuación.

Posteriormente, as investigadoras Paula Fraga e Lucía Ramos achegaron ao alumnado as súas investigacións no ámbito das TIC. Para comezar, Paula Fraga abordou o potencial da tecnoloxía 5G e a aplicabilidade da sensórica a diferentes ámbitos, ademais de amosar as súas investigacións no ámbito da realidade virtual e a realidade aumentada. Pola súa parte, Lucía Ramos falou aos asistentes sobre a aplicabilidade da Intelixencia Artificial ao ámbito da saúde; en concreto, de análise de imaxes oftalmolóxicas para a prevención e seguimento de diferentes patoloxías. Ademais, tamén explicou as súas investigacións sobre o estudo de imaxes de lineais mediante IA en puntos de venta para realizar estudos de mercado, así como do análise de imaxes recollidas por cámaras de seguridade para analizar o comportamento de persoas ou obxectos.

Seguidamente, o investigador Óscar Blanco realizou unha demostración do voo dun dron creado no marco do proxecto colaborativo Concordance sobre a prevención de colisións para UAVs utilizando técnicas de Deep Learning e sensórica optimizada.

Para finalizar, os investigadores Alberto Alvarellos e Ignacio Fraga presentaron o proxecto colaborativo Treboada, no que se utilizan técnicas de predición de precipitacións mediante sensores de baixo custe e aprendizaxe máquina. Así, os asistentes puideron coñecer o funcionamento dun sensor de predición de precipitacións na cuberta do CITIC.

LER MÁS

 

Esta mañá tivo lugar no CITIC a primeira reunión de traballo no marco do convenio de colaboración firmado entre a Universidade da Coruña,  e a Confederación Galega de Persoas con Discapacidade (COGAMI) e promovido polo CITIC, para a posta en marcha de proxectos conxuntos de avaliación e desenvolvemento das TIC aplicadas ao ámbito da discapacidade e a accesibilidade.

Ao acto asistiron por parte de COGAMI o presidente da entidade, Anxo Queiruga; a coordinadora de COGAMI Social, Charo Lema; a directora de negocio de COGAMI Empresarial, Rosa Guitiérrez; o responsable da área de Traballo Social de COGAMI, Juani Tubío; a coordinadora técnica sanitaria da área de Habilitación e Mantemento Funcional, Marta Dapena; e o coordinador de COGAMI en Coruña, Roberto Camba.

O encontro comezou cunha visita ás instalacións do CITIC e posterior presentación do centro e das súas principais actividades e proxectos desenvoltos, por parte do director del centro, Manuel F. González Penedo, e o subdirector, Javier Pereira. A continuación, desde o COGAMI expuxéronse as principais actividades que se levan a cabo desde a asociación.

LER MÁS

Marina Martínez, persoal destacado do CDTI (Centro de Desenvolvemento Tecnolóxico e Industrial) na oficina de Bruxelas (oficina SOST, Spanish Office for Science and Technology), visitará o CITIC entre o 8 e o 10 de maio co obxectivo de achegar o último programa de traballo de H2020 e o novo Programa Marco da Unión Europea, Horizon Europe.

O xoves 9 de maio terá lugar no CITIC a xornada "As TIC no novo programa de traballo 2020 del H2020", o principal obxectivo será adiantar aos asistentes o último programa de traballo H2020 e analizar todos os tópicos do programa de ICT e de algúns retos sociais. Ademais, realizará unha exposición sobre o novo Programa Marco da Unión Europea, Horizon Europe, que se está acabando de definir.

Para o venres 10 de maio está prevista a celebración na sala Cloud do CITIC da xornada "O último programa de traballo de H2020 e introdución a Horizon Europe",  organizada polo CITIC conxuntamente coa OTRI da UDC. Marina Martínez presentará de maneira máis global que na xornada do día anterior o último programa de traballo de H2020 e amosará as claves do Horizon Europe.

Marina tamén ofrecerá a conferencia “O panorama europeo en ciberseguridade: estratexia da Unión Europea; exemplos da xestión de incidentes”, orientada a alumnos do Máster universitario en Ciberseguridade MUNICS e a empresas especializadas no sector. Celebrarase o 8 de maio na sala Máster MUNICS do Edificio Área Científica da UDC.

Máis información na sección eventos da nosa web.

LER MÁS

A Cátedra UDC-everis en Transformación Digital, dirixida poa investigadora do CITIC Adriana Dapena, lanza unha convocatoria de axudas a investigadores visitantes: o Programa para o Fomento da Investigación e da Transferencia en Transformación Dixital.

Desta forma, a convocatoria ten como obxectivo contribuír á colaboración entre investigadores da Facultade de Informática da Universidade da Coruña e investigadores de recoñecido prestixio dotras universidades.

As persoas interesadas poden enviar as súas solicitudes a catedra.everis@udc.es antes do próximo 15 de maio, cubrindo esta solicitude.

Máis información

LER MÁS

O próximo 8 de xuño terá lugar no Teatro Rosalía de Castro o evento Naukas Coruña 2019, organizado polos Museos Científicos Coruñeses, a plataforma web Naukas e o Campus Innova da Universidade da Coruña. A temática sobre a que xira o encontro é o campo da medicina e a saúde no século XXI.

A investigadora do CITIC e directora do Campus Innova, Susana Ladra, participará na xornada coa súa conferencia “Big data y genómica: lo bueno, lo feo y lo malo”.

Programa de Naukas Coruña 2019:

09:30 Apertura de portas

10:00 Presentación a cargo de Víctor Grande

10:05 ¡Socorro, vivimos en un mundo obeso! María Pardo, IP Grupo Obesidómica, Instituto de Investigación Sanitaria de Santiago (IDIS/SERGAS)

10:30 El cáncer como compañero de viaje. Arkaitz Carracedo, Profesor de Investigación Ikerbasque en CIC bioGUNE; profesor Asociado da Universidade do País Vasco.

11:00 Traédeme cerebros! Iria Veiga, psiquiatra e divulgadora científica.

11:30 Pausa para café

12:00 ¿Es grave, doctor Google? Esther Samper, comunicadora científica.

12:30 La importancia de humanizar la medicina. Lucía Galán, pediatra.

13:00 Pobreza y salud: un círculo vicioso. Gabriela Jorquera, especialista e investigadora en pobreza, desigualdade e exclusión social.

13:30 Pausa para comida

16:00 Apertura de portas

16:30 Microbiota, un cambio de paradigma en la medicina personalizada. Ignacio López-Goñi, Museo de Ciencias Universidad de Navarra.

17:00 En busca de la fuente de la eterna juventud. Manuel Collado, investigador do Instituto de Investigación Sanitaria de Santiago de Compostela.

17:30 Big data y genómica: lo bueno, lo feo y lo malo. Susana Ladra, Investigadora do CITIC, Universidade da Coruña.

18:00 Pausa para café

18:30 Las bondades y peligros de las células madre. María Abad, Investigadora no Instituto de Oncoloxía de Vall d’Hebrón (VHIO).

19:00 CRISPR: recorta, pega y colorea genético. Lluis Montoliu, Investigador do Centro Nacional de Biotecnoloxía (CSIC).

19:30 É éticamente correcto todo o técnicamente posible? Unha introducción á Bioética. José Antonio Seoane, profesor de Filosofía do Dereito, UDC.

20:00 Los retos de la medicina personalizada. Ángel Carracedo, Coordinador do Grupo de Medicina Xenómica da Universidade de Santiago de Compostela.

20:30 Despedida e peche

 

Más información y registro

LER MÁS

Este venres, 26 de abril, ábrese a segunda convocatoria de adscrición ao CITIC, convocatoria que permanecerá aberta ata o 8 de maio de 2019.

Nesta ocasión poderán adscribirse os/as investigadores/as que, ademais de cumprir os requisitos de avaliación sinalados na normativa interna de adscrición, acrediten que a/as liña/s de investigación que están a desenvolver, así como a súa produción científica, atópanse no ámbito das TIC. O Comité de Dirección, ou comisión na que delegue, será o encargado de valorar o encaixe das devanditas liñas coa Axenda Estratéxica de Investigación do centro, e de comunicar, no caso de aceptación, a nova condición como membro do CITIC.

Todos os membros do CITIC deberán cumprir co regulamento vixente.

As condicións e o procedemento para solicitar o alta no CITIC son as seguintes:

Membros permanentes e non permanentes (ver apartado 2 da normativa): son o persoal investigador doutor funcionario ou laboral fixo da UDC e o persoal doutor con relación contractual coa UDC respectivamente. Estes membros serán validados no momento da solicitude en función dos criterios establecidos na normativa, isto é:

  • Membros permanentes: Calificación A, B, ou C da extinta ANEP ou sexenio de investigación activo.
  • Membros non permanentes: Profesor/a axudante doutor/a e doutores contratados a cargo de programas competitivos (RyC, JdC…). Non é necesaria acreditación ao estar recentemente avaliados.
  • Membros non permanentes: Profesor asociado, CIS investigador asociado. Acreditación A, B ou C da extinta ANEP ou acreditación equivalente (Ax. doutor, contratado doutor) obtida nos últimos cinco anos.

Tanto os membros permanentes como os non permanentes deberán cubrir o seguinte formulario online.

Unha vez cuberto o/a investigador/a recibirá un email de confirmación, que deberá imprimir e asinar electrónicamente e envialo a adscricion@citic-research.org antes do peche da convocatoria xunto con:

  • Curriculum Vitae Abreviado (que conteña un resumo executivo orientado a que o Comité de Dirección poida valorar a adecuación da súa pertenza ao centro segundo os méritos de investigación).
  • Avaliación da extinta ANEP e/ou sexenio activo.

Unha vez aceptado como membro do CITIC, o/a investigador/a permanente ou non permanente poderá dar de alta no centro ao seu persoal en formación e tecnólogos/as (ver apartado 2 da normativa), seguindo as instrucións que no seu momento lle facilite o persoal do centro.

As dúbidas de carácter xeral sobre o proceso de adscrición ou incidencias que puidesen xurdir serán respostadas nos teléfonos 881015533 (Beatriz Botana) e 881015503 (María Montero).

Ver publicación do anunción no portal de novas da UDC: https://www.udc.es/gl/novas/Segunda-convocatoria-de-adscricion-ao-CITIC/

LER MÁS

O II Congreso XoveTIC celebrarase os días 5 e 6 de setembro no CITIC. O evento está destinado a mozos investigadores (predoutorais e posdoutorais) de universidades galegas e do norte de Portugal, que poderán presentar comunicacións orais ou pósteres das súas investigación no ámbito das TIC. O obxectivo do evento é construír un espazo de encontro para o debate científico e contribuir así á súa formación.

Como novidade nesta edición, o Congreso XoveTIC está integrado na 27ª Conferencia Europea de Procesamento de Sinais (EUSIPCO 2019). Ademais, contará con relatores, investigadores e persoeiros pertencentes ao ámbito da industria de relevancia internacional.

O Congreso é de inscrición gratuíta e xa está aberto o prazo para a recepción dos abstracts.

Máis información

LER MÁS

A investigadora predoutoral do Laboratorio FASTPARSE do Grupo LYS do CITIC, Michalina Strzyz, asiste estes días á 20th International Conference on Computational Linguistics and Intelligent Text Processing - CICLing 2019. Esta conferencia, celebrada este ano en La Rochelle (Francia), conta cunha ampla e recoñecida traxectoria a nivel internacional no ámbito do Procesamento da Linguaxe Natural.

A investigadora presenta o seu traballo "Speeding up Natural Language Parsing by Reusing Partial Results", desenvolto no marco do proxecto FASTPARSE (ERC Starting Grant) xunto co seu director, Carlos Gómez-Rodríguez. Neste artigo os autores propoñen unha novedosa técnica que aplica o razoamento baseado en casos para a xeración de plantillas reutilizables correspondentes a fragmentos de árbores de análise sintáctica. Ditas plantillas, baseadas en bigramas e trigramas de etiquetas morfosintácticas (PoS tags), aproveitan o feito de que fragmentos de oración similares adoitan ter análises similares. O obxectivo deste enfoque é mellorar a velocidade dos analizadores de dependencia ao evitar cálculos redundantes.

LER MÁS

O conselleiro de Economía, Emprego e Industria da Xunta de Galicia, Francisco Conde, visitou o pasado venres as instalacións do CITIC para coñecer Cinfo, empresa ubicada no centro. Acompañárono na visita o reitor da Universidade da Coruña, Julio Abalde, o vicerreitor de Política Científica, Investigación e Transferencia, Salvador Naya, o director do CITIC, Manuel F. González Penedo, e o CEO de Cinfo, Antonio Rodríguez del Corral.

O conselleiro coñeceu algúns dos proxectos nos que traballa Cinfo. Rodríguez del Corral presentou ao conselleiro as solucións tecnolóxicas de intelixencia artificial, 5G, IoT e Big Data nas que a empresa está a traballar actualmente para o sector audiovisual, a industria 4.0 e a aeronáutica non tripulada.

Conde valorou a Cinfo como unha empresa de referencia no sector tecnolóxico que a levou mesmo a facerse internacional. Así mesmo destacou a importancia da relación entre a universidade e o sector produtivo para aportar valor engadido que diferencie e posicione os produtos galegos. O reitor, pola súa banda, resaltou que a convivencia da universidade e do sector produtivo no mesmo espazo “xera cada vez máis oportunidades de colaboración”. Neste sentido, Abalde suliñou que Cinfo ten unha interacción “intensa” coa universidade, motivo de orgullo ademais ao desenvolverse a partir dunha patente universitaria.

LER MÁS

Xa está aberto o prazo de presentación de candidaturas aos Premios de Transferencia de Tecnoloxía de Galicia 2019, convocados pola Real Academia Galega de Ciencias (RAGC) xunto á Axencia Galega de Innovación (GAIN) da Xunta de Galicia e que este ano celebra a súa quinta edición. O obxectivo deste certame é recoñecer casos de éxito en transferencia de coñecemento en Galicia e difundilos entre a cidadanía e, en particular, entre a comunidade investigadora e empresarial.

O prazo para a presentación de candidaturas estará aberto ata o 31 de maio e convócanse tres premios distintos:

  • Premio "Francisco Guitián Ojea", dirixido a grupos de investigación que, a través da súa labor en I+D aplicada, desenvolveran unha tecnoloxía susceptible de ser aplicada ao sector empresarial pero que aínda non fose transferida. A dotación do premio ascende a 6.000 euros e pode presentarse calquera grupo, coa única condición de que estea adscrito a un centro tecnolóxico ou de investigación situado en Galicia.
  • Premio "Fernando Calvet Prats", co que se recoñece o traballo dun grupo de investigación no que a tecnoloxía creada fose xa transferida con éxito ao sector empresarial. Os destinatarios son grupos radicados en Galicia e a dotación é tamén de 6.000 euros.
  • Premio "Ricardo Bescansa Martínez", que busca o caso de éxito máis representativo de innovación empresarial acadada a partir da transferencia de tecnoloxía. Poden concorrer empresas de calquera tamaño –galegas ou cun centro de traballo situado en Galicia– que acrediten innovacións procedentes da adquisición dunha patente, dun proxecto conxunto cun ou varios grupos de investigación ou outro mecanismo calquera de transferencia. A dotación do galardón ascende tamén a 6.000 euros. 

Máis información

LER MÁS

A Asociación de Enxeñeiros de Telecomunicación de Galicia, coa colaboración da Amtega, convoca unha nova edición do Premio Mellor Proxecto TIC con Beneficios Sociais. O galardón está destinado a recoñecer os mellores proxectos no ámbito das TIC que contribúan e aporten beneficios á sociedade. 

A este premio, de carácter honorífico, poden concorrer as persoas físicas, entidades e pequenas e medianas empresas, tanto de forma individual como conxunta ou con traballos de equipo, con sede en Galicia.

O prazo de recepción de candidaturas permanecerá aberto ata o luns 15 de abril ás 10:00 horas.

Máis información

LER MÁS

A convocatoria de accións individuais Marie Sklodowska Curie (MSCA-IF-2019) abrirá o próximo 11 de abril.  Esta convocatoria ten como obxectivo a mellora do potencial creativo e innovador dos investigadores con experiencia, a través de proxectos individuais que fomenten a mobilidade internacional e intersectorial. 

A convocatoria permanecerá aberta ata o 11 de setembro e conta cun orzamento de 294.49 millóns de euros. Está aberta a investigadores postdoutorais de calquera nacionalidade. Os candidatos que se presenten coa Universidade da Coruña non poden ter resido ou traballado en España durante máis de 12 meses nos últimos tres anos anteriores ao 11 de setembro de 2019, e non é necesaria vinculación actual nin previa do investigador candidato coa UDC.

LER MÁS

O investigador do CITIC Tirso Varela foi o encargado de presentar o traballo “Dv2v: A Dynamic Variable-to-Variable Compressor” na 2019 Data Compression Conference (DCC 2019) celebrada en Snowbird, Utah (EE.UU.) do 26 ao 29 de marzo. O DCC está considerado como o congreso máis prestixioso a nivel mundial no ámbito da compresión de datos.

Acompañárono Adrián Gómez-Brandón e Antonio Fariña, investigadores do CITIC.

Os tres, xunto a Neves Brisaboa (CITIC-UDC) e Gonzalo Navarro Badino (Universidade de Chile) son os autores do traballo presentado, que foi realizado en colaboración coa Universidade de Chile e froito do proxecto BIRDS.

O proxecto BIRDS (Bioinformatics and Information Retrieval Data Structures Analysis and Design) está financiado pola acción Marie Sklodowska-Curie (RISE) de intercambio de persoal de investigación e innovación pertencente ao programa de financiamento de I+D da UE Horizonte 2020 (proxecto con referencia 690941). BIRDS xorde da necesidade de mellorar o procesamento de grandes volumes de datos existentes en diferentes campos de aplicación como a bioinformática e a recuperación de información. No proxecto, ademais da UDC, participan universidades de Finlandia, Xapón, Australia, Chile e Portugal.

LER MÁS

María Montero, responsable de Estratexia de I+D+i do CITIC, e Dores Pérez Brun, en representación do Vicerreitorado de Política Científica, Investigación e Transferencia da UDC, atópanse nunha estancia de investigación no INESC TEC de Porto, no marco do programa IACOBUS.

O obxectivo é coñecer a organización e xestión de diferentes entidades de investigación do norte de Portugal e establecer relacións que poidan dar lugar a colaboracións entre a Universidade de Coruña, especialmente o CITIC, e os centros visitados.

No marco da súa estancia asistiron a numerosos encontros con entidades e empresas, entre os que destacan o INL (co que a UDC acaba de asinar un acordo marco); o Instituto Politécnico de Porto, o Laboratório de Reabilitação Psicossocial, a Oficina de Transferência de Tecnologia e Conhecimento (OTIC) do P.PORTO e a FEUP. Ademais, tamén se reuniron co equipo de dirección e xestión do INESC TEC, así como cos investigadores do Laboratorio de biomimagen e os representantes do Centro de Sistemas de Enerxía e do Centro de Robótica industrial e sistemas intelixentes do INESC TEC.

O programa IACOBUS ten como obxectivo principal fomentar a cooperación e o intercambio entre os recursos humanos dos centros de ensino superior da Eurorregión Galicia - Norte de Portugal - Profesores; Investigadores; Persoal de Administración e Servizos (PAS), facilitando a posta en común de actividades formativas, de investigación e de divulgación.

LER MÁS

Esta mañá visitaron o CITIC un grupo de alumnos de 4º de ESO do IES O Mosteirón de Sada. Mañá mércores farano alumnos de 3º de ESO do mesmo instituto.

Durante o día de hoxe, os alumnos visitaron os tres centros de investigación da Universidade da Coruña: o CITEEC, o CICA e o CITIC.

No CITIC, o subdirector do centro, Javier Pereira, recibiunos e ofreceu unha pequena presentación sobre o CITIC. Posteriormente, os investigadores Paula Fraga, Lucía Ramos e Óscar Blanco expuxeron o proxecto colaborativo Concordance sobre a prevención de colisións para UAVs utilizando técnicas de Deep Learning e sensórica optimizada. Ademais, tamén fixeron unha demostración de voo do dron que crearon para o proxecto.

Por outra banda, os investigadores Alberto Alvarellos e Ignacio Fraga presentaron o proxecto colaborativo Treboada, no que se utilizan técnicas de predición de precipitacións mediante sensores de baixo custo e aprendizaxe máquina. Así, os asistentes puideron coñecer o funcionamento dun sensor de predición de precipitacións na cuberta do CITIC.

LER MÁS

Un grupo de tres profesores do Instituto Politécnico de Porto visitaron o pasado luns as instalacións do CITIC, co obxectivo de buscar sinerxias no desenvolvemento de proxectos do ámbito da realidade aumentada aplicada á saúde e a monitorización con tecnoloxías IoT da poboación. Os asistentes foron Joao Donga, profesor da Escola Superior de Media Artes e Design, Paulo Veloso e Antonio Carlos Correia, profesores da Escola Superior de Saúde e membros do LabRP (Laboratorio de Rehabilitación psicosocial), que foron recibidos polo director e subdirector do CITIC, Manuel F. González Penedo e Javier Pereira, respectivamente.

Desde o CITIC vense colaborando con estas institucións portuguesas desde 2014 e estase traballando en establecer un convenio de colaboración entre a Escola Internacional de Doutorado e o Instituto Politécnico de Porto para favorecer a recepción de alumnos desde a institución portuguesa na UDC.

LER MÁS

A área de investigación de Ciencias da Computación da UDC, na que se engloba a maior parte da produción científica do CITIC, é a segunda mellor posicionada en canto a número de publicacións en Web of Science (WoS) en 2018. Durante o ano pasado, esta área produxo 121 documentos, o que supuxo o 9 % da cantidade total, superada unicamente por Enxeñaría, co 12 % das publicacións.

Web of Science é unha plataforma de información científica que recolle as referencias das principais publicacións de calquera disciplina do coñecemento, tanto científico como tecnolóxico, humanístico e sociolóxico. Trátase dunha ferramenta esencial para o apoio á investigación e para o recoñecemento dos esforzos e avances realizados pola comunidade científica e tecnolóxica.

Máis información

LER MÁS

O representante do CITIC na plataforma europea ECHAlliance, Marcos Ortega, asistiu á Learning Expedition LEX que tivo lugar en Israel do 11 ao 15 de marzo, invitado polo Clúster Saúde de Galicia. O principal obxectivo da Learning Expedition é identificar socios estratéxicos e posibilidades de colaboración, así como coñecer as últimas tendencias e boas prácticas de emprendemento, innovación e xestión local no ámbito da saúde. Marcos Ortega estivo acompañado polo business development manager do Grupo Varpa, integrado no CITIC, Pablo Guillemette.

A axenda destes días estivo repleta de actividades, sendo as máis destacadas as visitas ao Centro Médico Hadassh en Xerusalén, ao Hospital Rabin en Tel-Aviv, á incubadora de empresas eHealth Ventures e ao Google Campus para startups de TelAviv. Ademais, tamén se mantiveron reunións bilaterais con empresas israelís do sector saúde.

Esta actividade intégrase na axuda do IGAPE ao Cluster Saúde de Galicia, denominada “Apoio na promoción exterior conxunta das empresas -Convocatoria Pública Exporta Organismos Intermedios-”. O CSG busca con estas axudas mellorar a internacionalización e fomentar a innovación do sector saúde de Galicia.

A participación nesta actividade está cofinanciada ao 80 % a través do IGAPE e o Fondo Europeo de Desenvolvemento Rexional do Programa Operativo Galicia 2014-2020.

LER MÁS